IT TALKS #1. Ерлан Қамыров: Біздің потенциалымыз тек ТМД мемлекеттерімен шектелмейді

print «Hello World!»

Құрметті достар! Біздің бүгінгі IT TALKS сұхбатымыздың қонағы — белгілі IT маманы Ерлан Қамыров. Сіздермен пернетақта алдында мен Садық "Қарасақал" Шерімбек.


— Ерлан, бүгінгі сұхбатымызға қош келдің! Өзің жайлы айта кетсең!
— Рахмет, Садық! Толық есімім — Қамыров Ерлан Ерманұлы. Мен Солтүстік Қазақстан облысы, Аққайын ауданы, Қызыл-Жұлдыз ауылында 1989 жылы сәуірдің 9-шы жұлдызында дүниеге келдім. Қазіргі таңда ARTA Software компаниясында Білімді жинақтау орталығының басшысы болып қызмет атқарамын.

— Ең алғаш рет IT саласына қашан қадамыңды бастың?
— Ең алғаш рет компьютер біздің ауылымызға 2001-2002 жылдары келген еді, сол кезден бастап кірдім десен болады. Себебі сол кезден компьютерге қызығып, информатика мұғалімінің барлық қойған тапсырмаларын орындап жүрдім (көбінесе құжат теру). Кейін темір-тесекті баптауды уйрене бастадым. Қаладағы мектепке көшкеннен кейін HTML және Visual Basic туралы кішкене білдім. Бірақ үйрететін адам болмаған соң өзімше үйренуге тура келді. Мектепті аяқтаған соң, барлық болашағымды IT саласымен байланыстырғандықтан, Еуразия Ұлттық университетінің Ақпараттық технологиялар факультетіне түстім. Бұл жерден бастап бұл салаға кәсіби түрде қадамым басталды десе де болады.


— Linux маманы ретінде көпшілікке аталмыш амалдық жүйенің басты артықшылықтарынан қай тұстарын айта аласың? Не үшін қолданушылар бұл амалдық жүйені қолдануы тиімді деп ойлайсың?
— Өзімді Linux маманы ретінде санамаймын. Менің білетінім 9 білмейтінім 99. Бірақ, алдыма қойылған мәселелерді шешу қажеттілігі туғанда, қажетті нәрсені тез ұғатын әдетім бар. Linux амалдық жүйесінің басқа амалдық жүйелерге қарағанда артықшылықтары да кемшіліктері де көп. Әр адам өзінше қорытынды жасайды деген ойдамын. Бірақ, сонда да саған шағын бірнеше артықшылығын тізіп берейін.
  • Тегін. Сатып алудың қажеті жоқ.
  • Икемділік. Амалдық жүйені өзіне ұнайтындай баптай алу мүмкіндігі.

  • Вирусқа төзімділік. Бұл амалдық жүйеге жазылған вирустардың саны өте аз.

  • Тұлғаның дамуына мүмкіндік. Linux амалдық жүйесінде кейде бір қарапайым істі жасау үшін басыңды қатыру керек. Бір жағынан бұл қасиетті кейбіреулері кемшілік ретінде қарауы мүмкін, бірақ мен керісінше артықшылық ретінде қабылдаймын.


— Қазір Open Source және Commercial бағдарламалардың текетіресі ғой. Өткенде 10 жыл бойы Linux қолданған Мюнхен әкімшілігі қайтадан Windows амалдық жүйесіне ауысып жатқанын білеміз. Бірақ, материалдық жағынан келгенде Commerce жобалар көп жағдайда ұтып жатады. Open Source идеясын ары қарай дамыту үшін дамытушы ұжымдарды тұрақты ұстап тұрудың энтузиазмнан басқа да қандай жолдарын айтар едің?
— Оpen Source идеясын дамытудың мен білетін бір әдісі ол — оны қаржыландыру. Иә, айтып отырған ойымның Open Source идеясына кішкене қайшы тұстары бар. Бірақ, бұл тәжірибе қазір үлкен серпінмен даму үстінде. Қазір көптеген компаниялар осындай дамытушы ұжымдарға қаржылай қолдау көрсетіп, олардың ары қарай дамуына үлес қосу үстінде. Одан бөлек қарапайым қолданушылар да donate арқылы рахметтерін айтып жатады.

— Қазақстанда жергілікті халыққа толықтай ыңғайластырылған Linux дистрибутиві қажет деп ойлайсың ба? Егер сондай жасалынатын болса, бұл тұрғыдан тәжірибесі мол маман ретінде қандай факторларға аса мән беретін едің?
— Иә, бізге бұл қажет деп ойлаймын. Біздің компаниямыздың өзінің жасаған дистрибутиві бар. Оны өзім де қолданамын. Мен үшін өте ыңғайлы. Бірақ әзірге бұл жоба белгілі бір аз уақытқа дейін тоқтатылды. Оны болашақта жандандырамыз деген үмітім бар. Бұйырса оған өзім де ат салысуға тырысамын.

— Жалпы мамандықтың жаманы жоқ қой. Бірақ, IT саласы қазіргі уақытта дүниедегі ең мықты салалардың бірі екені даусыз. Осыны болашақ ізденушілерге насихаттау, кәсіби ориентация жағынан қандай ұсыныстар айта аласың?
— Жүрген жерімде айтатыным: — Балаңды, программистке жібер! Әлеуметтік желілерде және бірнеше өзім ат салысып жатқан жобаларда IT мамандығын ылғы насихаттап жүремін.



— IT саласындағы қыздардың рөлі қандай деп ойлайсың? Бізде мысалы, олар аз. Қарсы жыныстағы нәзік жандар үшін бұл саланы алып кету оңай деп ойлайсың ба? Жалпы, оларды көбейтудің қандай жолдары бар деп ойлайсың?
— Шынымды айтсам, мектепті бітіргеннен кейінгі уақытқа дейін мен бұл сала тек жігіттерге жарасады деп ойлағанмын. Университетке түскенде де тобымның басым бөлігі көзілдірік киген жігіттер болады деген оймен келгенмін. Бірақ, топтың 2/3 бөлігі қыздар болып шықты. Бұл статистика қазір де сақталып жүр. Бірақ, оқу аяқталғанша дейін көбі күйеуге кетіп, кейін бұл саладан басқа салаларға көшіп кетеді. Дегенмен, мен танитын бірнеше мықты программист қыздар бар. Олар қазір ең мықты деген жобаларда басты бағдарламалаушы қызметін атқаруда. Қыздарды көбейтуге ешқандай әрекет жасау қажет емес. Олар онсыз да көбеюде.


— Мысалы, көршілеріміз Украина, Беларусь елдері IT саласында аймақтағы ең мықты елдер. Бұл жөнінен Қазақстанның ақпараттық технологиялар әлеміндегі болашақ потенциалын қалай елестетесің?
— Потенциалымыз ақпараттық технологиялар жөнінде өте көп. Жан-жақты барымызды салып, жақсылап еңбектенсек үлкен жетістіктерге жетеміз деп сенемін. Қазіргі таңда бірнеше Ресейлік компаниялармен IT серіктестік жөнінде келіссөздер жүргізудемін. Біздің жасап жатқан жүйемізді мақтап жатқандары мені қатты қуантады. Бір білетінім біздің потенциалымыз тек қана ТМД мемлекеттерімен шектелмейді.

— Өзің істеп жүрген бағытта болашақ мамандарға қандай оқулықтарды оқуды кеңес бересің?
— Өз басым кәсіби әдебиетті жақсы көремін. Ал, көркем әдебиеттен қашамын. Жігіттер мен қыздарға кеңес беретін кітаптің үшеуін айтып берейін. Соңғы екеуін жақын арада оқып болдым:
  • Құран Кәрім
  • Стивен Р. Кови. «Семь навыков высокоэффективных людей»

  • Джош Кауфман. «Сам себе MBA»



— IT саласына қатысты көретін фильмдерің қандай?
Негізі, бұл салаға қатысты шыққан кинолардың барлығын қызығушылықпен қараймын, ең ұнағаны «Кадрлар» деген фильм.


— Алдағы жоспарларыңмен бөлісе отырсаң!
— Жоспарым, қазақ IT саласының дамуына өз септігімді одан да арттыру. Өзімнің жеке дамуымды тоқтатпау (барлық бағытта: спорт, білім, рухани білім, тілдер және т.б.). Болашақ әрекеттерімде де жоспарлар көп, бірақ оларды мен айтпай-ақ қояйын, кейін өздеріңіз көріп жатасыздар деген үміттемін. Сұрақтарың үшін рахмет, Садық! Көріскенше!
— Көріскенше Ерлан! Жұмыстарыңа, отбасыңа сәттілік! Cөз соңында айтарым:
01110010 01100001 01101000 01101101 01100101 01110100 00100000 01110011 01100001 01100111 01100001 01101110 00100000 01111001 01100101 01110010 01101100 01100001 01101110 00100001


Құрметті қауым сіздермен келесі сұхбаттарымызда IT TALKS жобасында жолыққанша қош сау болыңыздар!
P.S. Ұсыныстарыңыз бен тілектеріңізді астына жазуға рұхсат! Күтеміз!

sys.exit()
  • +12
21 пікір
kamyrov
Сұхбат үшін рахмет tonukok !)
raimbek
— Көріскенше Ерлан! Жұмыстарыңа, отбасыңа сәттілік! Cөз соңында айтарым:

01110010 01100001 01101000 01101101 01100101 01110100 00100000 01110011 01100001 01100111 01100001 01101110 00100000 01111001 01100101 01110010 01101100 01100001 01101110 00100001


Вощм былай:

>>> n = int('011100100110000101101000011011010110010101110100001000000111001101100001011001110110000101101110001000001111001011001010111001001101100011000010110111000100001', 2);
>>> binascii.unhexlify('%x' % n)
'rahmet sagan yerlan!'


Саған да рақмет, Садық, сұхбат үшін ))
raimbek
Мен осы басқа мемлекеттердің (Ресей, Қытай, Германия...) өз дистрибутивтарын жасау деген қызық ойларына түсінбеймін (құдайға шүкір бұл ауру әлі бізге жұққан жоқ, тфай, тфай), не үшін деп ойлайсыңдар? Кейін біздің мемлекетте, мысалы мектепте оқыту үшін, жеке linux дистрибутиві қажет пе?
kamyrov
Ubuntu, Mint және т.б.-ы бар, соны алып ендіре берсе болады ғой мектептерге). Ал ұлттық қауіпсіздікпен айналысатын мекемелер үшін мумкін керек те шығар.
raimbek
ұлттық қауіпсіздікпен айналысатын мекемелер үшін мумкін керек те шығар.
егер солай десек онда windows-ты неге пайдаланады? )) windows-та басқа дистрибутив керек емес те, linux-та керек болып қала ма? )
nurzhol
Амиго, сұхбат үшін Садыққа және Ерланға рақмет!

Ерлан, алда қойған мақсаттар мен атқарылып жатқан жұмыстар өз нәтижесімен қуанта беруіне тілектеспін!

Меннен бір сқрақ:
— Қазір нарықта жұмыс жасап жатқан, оған өзің де үлес қосқан жобалардан мысал жазып жібер. Мархабат!
kamyrov
Рахмет Нұржол, бұрын проект-менеджер қызметінде жұмыс атқарғанда Президент Әкімшілігінде, Қазақтелеком, Востоктелеком, Самрұқ-Қазына, ҚазТрансОйл, Спорт және туризм агенттігі, Сыртқы істер министрлігі және т.б. коптеген мекемелердегі ақпараттық жүйелердің ендірілуне қатысқанмын. Қазіргі таңда ARTA Software компаниясының Білімді жинақтау орталығында басшы қызметін атқарамын, жобаларға тікелей қатысым жоқ, бірақ серіктестердің (Қазақстан, Ресей, Қырғыстан және Сингапур) жобаларына көмектесіп отырамын.
tolebi
Құран Кәрімді бірінші ұсынғаныңа Алла разы болсын! Ісіңе, отбасыңа, иманыңа Алла береке берсін!
Bad_Robot
Ерлан маған Убунтуға қатысты жеке сұрақтарыма жауап бере ме екен? :)
kamyrov
Жауап береді, мына жер ozinizde.kz?q=166 сұрақтарына жауап таппасан:)
Bad_Robot
Адоб Хромиумды қолдауын тоқтатты дегеннен кейін, онлайн видео ойнатылуынан проблема туындап кетті. Альтернатив флештар орнатып көргенмін, бірақ Адобтың орнын толық баса алмады. Шешімі бар ма проблеманың?
shainek
Yandex браузерді қарап көр бауырым, олар бірнәрсе қып флэшті қосыпты браузерге, жақында ғана linux-қа бета версиясы шықты. Негізі хромға да солардың істегенін істеп қосып қоюға болады
kokhayeva
Жұмыстарыңа сәттілік тілеймін! Шараның видеоверсиясы болады деп үміттенемін. Жарнамалардың таралуы нашар болды. Бүгін ғана Фбдан көрдім. Жоспарларды аяқ астынан өзгерту мүмкін емес, әйтпесе міндетті түрде қатысатын едім.
kamyrov
Рахмет!) Жарнама жасайтын ресурстарымыз бар, бірақ біз оларды әлі қоспай отырмыз, себебі барлық назарды контенттің сапасына және сайтқа барынша мықты қазақ IT мамандарын тартуға бөліп отырмыз. Біздің сайтқа қош келіпсіз, біздің игі іске қол үшін тигізесіз деген үміттемін)
muratov91
Ерлан тек алға!
Ерлан — біздің codeo-нің жанашыры!
haker_9200
Ерлан ісіңе сәттілік аладағы уақытта жаңа жобаларыңды күтеміз. Сөз соңында Form1.caption= *sattilik*;
kamyrov
muratov91 haker_9200 рахмет жігіттер игі тілектеріңіз үшін!)
vfvtnjd
Амалдык жуйе деген не?
shainek
Операциялық жүйе дегені шығар
Тек тіркелген қолданушылар ғана пікір қалдыра алады.