Қазақстанда интернетті пайдаланушылар саны 10 миллионнан асты

Қазақстанда интернетті 10 млн. астам адам пайдаланады. Бұл туралы бүгін Астанада өткен «Қазақстандық БАҚ және интернет-ресурстардың бәсекеге қабілеттілігін арттыру» атты семинар-тренингте ҚР Мәдениет және ақпарат министрлігі Ақпарат және мұрағат комитетінің төрағасы Болат Кальянбеков мәлім етті.

Б.Кальянбековтің сөзіне қарағанда, қазіргі уақытта Қазақстанда интернет пайдаланушылардың саны артып келеді. «Соңғы 10 жылда дүниежүзінде интернет-пайдаланушылардың саны 5 есеге дейін күрт өскен. Қазақстанда да интернет қарқынды дамып келеді. ҚР Көлік және коммуникация министрлігінің мәліметі бойынша, 2013 жылы наурыз айында Қазақстанда интернеттің кірігу деңгейі 62,3 пайызды құраған. Бұл шамамен 10 млн. астам адам», — дейді ол.

Комитет басшысының атап өткеніндей, соған байланысты интернетте отандық контенттің қалыптасуы да заңдылық.

«2010-2013 жылдар ішінде сайттар мен KZ және KAZ домендерінің аумағы екі есеге көбейген. Қазіргі уақытта елімізде 95 мыңнан астам домен тіркелген. Яғни бүгінгі таңда интернеттің қазақстандық сегментінде осыншама сайт бар деген сөз», — деді ол.

© ҚазАқпарат